Կարմիր գյուղի (Դռնավարզ) Սուրբ Աստվածածին եկեղեցու տապանաբակում՝ հարավարևելյան պատի տակ, պահպանվել է մեկ ամբողջական քարից կերտված սեղանաձև մեծ տապանաքար։ Այն ունի ընդգծված քիվ և դրված է քիվի հարդարանքը կրկնող ցածր, ավելի լայն պատվանդանի վրա։ Շիրմաքարի հարավային նիստին ութտողանի արձանագրություն է փորագրված։ Ուշագրավ է, որ արձանագրությունը սկսվում է քիվի վերին գոտում և շարունակվում տապանաքարի հարավային նիստին՝ լրացնելով ողջ դաշտը․ «Տ(ապան)իս ամփոփի մարմին լուս[ա]հ[ո]գի վաղ[ա]թ[ա]ռամ | Խանումին դստեր դռնավարզեցի Յոhաննիսի Երեմե|անց եւ ամուսնոյ Իսրայէլ ք[ա]հ[ա]ն[ա]յին Տ[է]ր Պողոսե[ա]ն Տ[է]ր Մանու|էլե[ա]նց որ ձեռնադր[ու]եց[ա]ւ ք[ա]հ[ա]ն[ա]յ ի 5 սեպտեմբ[եր] 1870 ամի ծնուն|դն ս[ո]ր[ա] եղեւ ի 1850 եւ վախճանն ի 1871 ամի ի 8 ապրել ի | թողեալ զ երկուս երա(խ...)ա Դանիէլ եւ Մինայ խանում | յաջողու[թեամ]բ Տ[եա]ռն յիւ․․․․ ․․․ր[․․․]տի ամփոփիչ | ի ներքոյ տ[ա]պ[ա]նիս ․․․ Իսրայէլ ք[ա]հ[ա][ն[ա]]յ[ի]ն»։

Արձանագրությունը մասամբ վնասված է քիվի վերին ձախ և նիստի կենտրոնական հատվածներում։ Շիրմաքարի կողային երկու նեղ նիստերը քանդակազարդ են, հյուսիսային նիստը չի վավերացվել։

Հատկապես հետաքրքիր է արևելյան նիստին՝ երեք կամարակապ խորանների ներքո քանդակված հորինվածքը։ Կենտրոնական խորանում՝ Գողգոթան խորհրդանշող պատվանդանին, մեծածավալ ծաղկած խաչն է՝ թևերի եռաբողբոջ վերջավորություններով։ Կենտրոնական խորանի աջ և ձախ կողմերում գտնվող երկու նմանատիպ կամարաձև, նախշազարդ խորանների ներքո՝ քառակուսի շրջանակի մեջ, ձախից կնոջ պատկերաքանդակ է, իսկ աջից՝ միանգամայն անսովոր խաչային հորինվածք և խաչակիր գավազան։ Հարկ է նշել, որ աջից պատկերված անձը քանդակված է հասակով մեկ կանգնած, ձեռքերն առջևում՝ որովայնի հատվածում իրար միացրած, երկար, գոտկատեղից ծալքավոր զգեստով։ Հատկապես ուշագրավ և արտասովոր է կնոջ քանդակի լուսապսակ գլուխը, որտեղ դեմքի փոխարեն քանդակված է ինըթերթանի վարդյականման ծաղիկ։ Եռախորան հորինվածքի կենտրոնական խորանի վերևում՝ շրջանակից դուրս, թևերը պարզած հրեշտակի կամ թռչնակերպ հուշկապարիկի պատկեր է։ Համաձայն գերեզմանաքարի երեսին փորագրված վերոնշյալ արձանագրության՝ տապանն ամփոփում է «դռնավարզեցի Երեմեանց Յոhաննիսի դստեր և իր ամուսնու Տ[է]ր Մանու|էլե[ա]նց Տ[է]ր Պողոսե[ա]ն Իսրայէլ ք[ա]հ[ա]ն[ա]յի աճյունները»։

Արևելյան կողին՝ ծաղկամանի մեջ, քանդակված են խոնարհված զույգ երկճյուղ ծաղիկներ՝ գրեթե հայելանման դիրքով։