Կարմիր գյուղը 2023 թվականի սեպտեմբերի 20-ին բռնազավթվել է Ադրբեջանի կողմից։ Հուշարձանի ներկայիս վիճակն անհայտ է։

Մեծ Հայք, Արցախ աշխարհ, Մուխանք գավառ (հետագայում՝ Վարանդա), մինչև 2023 թ․՝ Արցախի Հանրապետություն, Ասկերանի շրջան։

Կարմիր գյուղի (Դռնավարզ) Սուրբ Աստվածածին եկեղեցու տապանաբակում՝ հարավարևելյան հատվածում, պահպանվել է Պետրոս քահանայի տապանաքարը, որը հարավային պատի տակ գտնվող շիրմաքարերից վերջինն է։ «Դագաղաձև» տապանաքարը դրված է գրեթե նույն բարձրության, փոքր-ինչ լայն պատվանդանի վրա։ Տապանաքարի վերին հորիզոնական հարթությունը բաժանված է երկու առանձին շրջանակների մեջ առնված գոտիների։ Վերին հատվածում իրար զուգահեռ զույգ խաչաքանդակներ են՝ եռաբողբոջ, կլորավուն թևերով։ Ձախակողմյան խաչի ստորին մասում քահանայի գավազանն է պատկերված, իսկ աջակողմյան խաչի տակ՝ գավազանի ուղղությամբ, փորագրված է տապանագիրը․ «Տապանս Պետրոս քահա|նայի Տէր Յոհանէսեան Տէր Ման|ուէլեանց վախճան 13 յուլիսե | 1912 թ 73 ամայ»։ Տապանաքարի հարավային նիստին փորագրված է․ «Օ(ր)հնելով զժառանկութիւնս եւ ժողովուրդս | հեռանու(մ) էմ տիպ յաւիդենականութիւն»։

Կարևոր է Արցախի Դռնավարզի (Կարմիր գյուղ) պատմության, ինչպես նաև հոգևոր կյանքի ուսումնասիրման համար։