Թաղոտ, Սուրբ Հովհաննես եկեղեցի, տապանաքար № 2
Հուշարձան
Տիպային անվանումը
Տապանաքար Այլ անվանումներ
Հախնազարի տապանաքար Օգտագործումը՝ սկզբնական, հաջորդական և ժամանակակից
Գերեզմանաքար
Պահպանման միավորի անվանումը
Տապանաքար
Տեղագրական տեղեկանք
Շրջանը, համայնքը, բնակավայրը
Բնակավայրը մաս է կազմել պատմական Մեծ Հայքի Արցախ աշխարհի Մյուս Հաբանդ գավառի, հետագայում ընդգրկվել է Դիզակ գավառի և համանուն մելիքության կազմում։ Մինչև 2020 թ․՝ Արցախի Հանրապետություն, Հադրութի շրջան, Թաղոտ։
Հեռավորությունը և դիրքը բնակավայրից
Գտնվում է Թաղոտ գյուղի հյուսիսարևմտյան եզրի ժայռոտ լեռնաճյուղին՝ Սուրբ Հովհաննես եկեղեցու հարավային պատին կից։
Տեղանքի բարձրությունը ծովի մակերևույթից
Բարձր է ծովի մակերևույթից 833 մ։ Ջրագրությունը
Գտնվում է Իշխանագետի Թաղոտա գետ վտակից 150 մ հարավ։ Նկարագրություն
Տապանաքարը տեղադրված է Սուրբ Հովհաննես եկեղեցու հարավային պատին կից։ Ուղղանկյունաձև տապանաքար է, որի վերին նիստի ողջ մակերեսը ծածկված է երկու պատկերաքանդակ հորինվածքներով։ Վերևում՝ սրածայր խորանի ներքո, խաչաթևերի կլոր ելուստավոր վերջավորություններով ծաղկած խաչ է քանդակված՝ խաչարմատից դեպի աջ և ձախ բարձրացող արմավաճյուղերով։ Վերջինիցս ցած՝ առանձին շրջանակի մեջ, երկար ծաղկաման է՝ գեղեցիկ միացողուն յոթ թրաշուշաններից կազմված ծաղկեփնջով, որն իր հերթին պսակված է յոթթերթանի ծաղիկ-վարդյակով։
Տապանաքարի վերին և հարավային նիստերի անկյան կիսաթեք հատումից առաջացած նեղ նիստին փորագրված է․ «[Այս] է տ(ա)պ(ա)ն Եղիազարի որդի Հախնազարին, թվ(ին) ՌՃՁ (1731)»1։
Պատմական տեղեկանք
Մշակութային պատկանելությունը, դարաշրջանը, դարը (դարերը)
Հայ Առաքելական Եկեղեցի, 18-րդ դար (1731 թ․)
Թվագրման հիմնավորում` ըստ վիմագրության
Ըստ տապանագրիՀուշարձանի ժամանակագրական աղյուսակը
Կանգնեցվել է 1731 թվականին և իր սկզբնական դիրքով պահպանվել մինչև 2020 թվականի հոկտեմբեր։ Թաղոտ գյուղը 2020 թվականի հոկտեմբերից բռնազավթվել է Ադրբեջանի կողմից։ Հուշարձանի ներկայիս վիճակն անհայտ է։
Հուշարձանի ուսումնասիրման ժամանակագրական աղյուսակը (ժամանակը, հեղինակը, աշխատանքները)
2021 թվականին ՀՃՈՒ հիմնադրամի «Վարձք» հանդեսի 15 համարում լույս է տեսել «Թաղոտ գյուղի հուշարձանները» հոդվածը՝ Էմմա Աբրահամյանի հեղինակությամբ: Նկարագրական-բնութագրական տեղեկանք
Տիպը
Ուղղանկյունաձև տապանաքար Չափերը` երկարությունը
145 սմ Չափերը` լայնությունը
48 սմ Չափերը` խորությունը, հաստությունը
24 սմ Պահպանվածությունը` որակական (լավ, միջին, վատ, վթարային, կիսավեր, ավերակ)
Լավ Արժևորումը
Կարևոր է Արցախի Հադրութի շրջանի, Թաղոտ գյուղի և Սուրբ Հովհաննես եկեղեցու պատմության ուսումնասիրության համար։ ----------------------------
1Աբրահամյան Է․, 2021, էջ 62։ Լուսանկարներ
Գրչանկարներ
...
Հիմնական մատենագիտություն
Աբրահամյան Է․, 2021 - Աբրահամյան Էմմա, «Թաղոտ գյուղի պատմական հուշարձանները», Վարձք, № 15, Հայկական ճարտարապետությունն ուսումնասիրող հիմնադրամ, Երևան, 2021։ .
Գ․ Բ․, Ա․ Լ-Ե․