Քարագլուխ գյուղի կենտրոնական հատվածում է գտնվում Սուրբ Աստվածածին եկեղեցին, որի հարավային կողմի գերեզմանոցում՝ մուտքից աջ, պահպանվել է Տեր Իսրայել քահանա Օհանյան-Մարկոսյանցի տապանաքարը։ Այն մեծ չափերի, ուղղանկյունաձև, հարթ վերնամասով շիրմաքար է, որի հարավային լայն նիստի կենտրոնական մասում վեց տողից բաղկացած արձանագրություն է փորագրված․ «Այս տապանիս ամփոփեալ մարմին | լուսահոգի Տ[եար]ն Իսրայէլ քահանային Յօ|հանեան–Մարկոսեանց հոգեւօր հո|վուին Քարագլուխ գեղջ Խաչինոյ | որ վախճանեցավ ի 53 ամայ հասակի | յամի ազգ[ային] ՌՅԴ (1303+551=1855) եւ փր[կչական] 1855 դեկտեմբերի 11»։ 

Արձանագրությունը երիզված է բուսական և երկրաչափական եռաշերտ զարդագոտիներից կազմված լայն շրջանակով, որն առանձնանում է իր նրբագեղությամբ։Տապանաքարի հյուսիսային նիստին պարանաձև և պարանահյուս երկշերտ զարդագոտի շրջանակի մեջ ընդգրկված երեք կամարաձև խորաններում պատկերված են ծաղկազարդ կենաց ծառեր։ Հուշարձանի արևմտյան և արևելյան նեղ կողերը նույնպես քանդակազարդ են։ Արևմտյան կողին թևերի բողբոջաձև վերջավորություններով գեղազարդ խաչ է, իսկ թևերի միջանկյալ մասերում ոճավորված բուսազարդեր են։ Այս խաչաքանդակը երիզված է նրբագեղ խաչաձև շրջանակով։ Արևելյան կողին բուսական զարդանախշեր են։