Շախկախի վանքի տարածքում ուխտավորների համար նախատեսված կացարանը կառուցվել է 1875 թվականին։ Այն ծառայել է որպես կացարան մինչև 20-րդ դարի սկիզբը։ Խորհրդային տարիներին շինությունը վնասվել է, և պատերի որոշ հատվածներ փլուզվել են։

2020 թվականի հոկտեմբերից Սարինշեն գյուղը բռնազավթված է Ադրբեջանի կողմից։ Հուշարձանի ներկայիս վիճակի մասին տեղեկություններ չկան։

Հադրութի շրջանի Սարինշեն գյուղից 1 կմ հարավ գտնվում է Շախկախի վանքը։ Այն պաշտամունքի և ուխտագնացության կարևոր վայր է եղել ոչ միայն Դիզակի, այլև հարևան գավառների բնակչության համար։ 1865 թվականին վանքի Սուրբ Աստվածածին եկեղեցու հիմնովին վերակառուցումը նպաստել է ուխտագնացության աճին դեպի այս նվիրական սրբատեղին։ Ուխտավորների կեցությունն ապահովելու համար 1875 թվականին Շուշիի բնակիչ Ավետիս Սարգսյան Սարդարյանցի միջոցներով եկեղեցուց արևմուտք կառուցվել է կացարան։ Կառույցը ուղղանկյուն հատակագծով, թաղակապ շինություն է։ Բոլոր պատերի տարբեր հատվածներում կան կենցաղային նպատակներով արված բազմապիսի խորշեր։ Արևելյան և արևմտյան պատերին հավասարաչափ ուղղանկյուն պատրհաններ են։ Հյուսիսային պատի կամարակապ խորշի մեջ հավանաբար եղել է բուխարին։ Արևելյան և արևմտյան պատերի մասնակի փլուզման պատճառով հայտնի չէ լուսամուտների իրական քանակը։ Հարավային պատին՝ մուտքից դեպի արևմուտք, պահպանվել է ցածրադիր և մեծ չափերով մեկ լուսամուտ։

Շինության հարավային կողմում բացված մուտքի կամարակապ բարավորին պահպանվել է երկու նախշազարդ վարդյակների միջև տեղադրված շինարարական արձանագրությունը՝ պսակված հավասարաթև խաչաքանդակով․ «Շինեալ յիշատակ միակ այս սենեակս | Շ[ու]շի ք[աղաքա]ցի Աւետիս Սարգսեան Սարտարեանցս | բնակարան ուխտաւորաց ի ս[ու]րբ տեղեացս | 1875 ամի փրկչակական թուականացս»։

Կարևոր նշանակություն ունի Շախկախա Սուրբ Աստվածածին վանքի պատմության, հոգևոր կյանքի, ինչպես նաև վանական համալիրների կացարանների ուսումնասիրության համար։