Գերեզմանային կոթող՝ վերօգտագործված որպես եկեղեցու հարդարանքի մաս։

Մեծ Հայք, Արցախ աշխարհ, Մեծ Առանք (հետագայում՝ Խաչեն) գավառ։ 1992-2020 թթ․՝ Արցախի Հանրապետություն, Ասկերանի շրջան, Խրամորթ գյուղ, Քարագլուխ գյուղատեղի։

Գտնվում է Քարագլուխ գյուղատեղիի կենտրոնում և տեղադրված է Սուրբ Աստվածածին եկեղեցու հարավային պատին՝ մուտքի շրջանակի աջ կողմում։

Խաչքարն ագուցված է Քարագլուխ գյուղատեղիի Սուրբ Աստվածածին եկեղեցու (19-րդ դ.) հարավային պատին՝ մուտքի աջ կողմում։ Այն տեղադրվել է եկեղեցու վերանորոգման ժամանակ՝ վերօգտագործվելով որպես հարդարանքի մաս։

Համեստ չափերի այս կոթողը ուղղահայաց, երկարաձիգ քարե սալ է, որը դեպի վերև լայնանում է և ունի կիսակլոր, կամարաձև վերջավորություն։ Խաչքարի հորինվածքի կենտրոնում՝ եռաստիճան հիմքի վրա՝ կամարաձև խորանի ներքո, հյուսվածազարդ ու մեծադիր ծաղկած խաչն է, որի թևերն ավարտվում են զույգ եռաբողբոջ ծիլերով։ Խաչաթևերի պարանահյուս նախշերը կենտրոնում ձևավորում են մեկ այլ փոքրիկ պարզատիպ խաչապատկեր։ Կենտրոնական խաչի հիմքից սկիզբ է առնում և դեպի երկու կողմ տարածվելով՝ վեր բարձրանում մեկական գալարապտույտ խաչարմատ։ Վերջիններս իրենց ծայրին կրում են խաչաթևերի գնդաձև զույգ վերջավորություններով մեկական փոքրիկ խաչ։ Եվս երկու ավելի փոքր խաչեր քանդակված են հորիզոնական խաչաթևերի վերնամասում՝ խաչակամարի ներքո։ Խաչքարի ողջ հորինվածքը երիզված է լայն գեղաքանդակ, հյուսվածազարդ շրջանակով՝ բացառությամբ ստորին հատվածի, որտեղ փորագրված է անավարտ երկտող արձանագրություն․ «Ս[ուր]բ խ[ա]չս | փրկութ[ի]»¹։

Խաչքարն իր հորինվածքով և կատարողական արվեստով անմիջական զուգահեռներ ունի Չափնիի 1281 թվականի, Լև գյուղի մերձակայքի 13-րդ դարի և մի շարք այլ հուշարձանների հետ, որը հիմք է տալիս այն թվագրելու 12-13-րդ դարերով։

Կերտվել է 12-13-րդ դարերում՝ որպես գերեզմանային կոթող։ Հետագայում՝ 19-րդ դարում, խաչքարը տեղադրվել է Սուրբ Աստվածածին եկեղեցու հարավային պատին։