Գերեզմանոցը հիմնվել է առնվազն 10-րդ դարում, որտեղ հուղարկավորություններ են կատարվել մինչև 13-րդ դարի վերջերը։

2023 թվականի սեպտեմբերից Դահրավ գյուղը բռնազավթված է Ադրբեջանի կողմից։ Հուշարձանի ներկայիս վիճակն անհայտ է։

Մեծ Հայք, Արցախ աշխարհ, Հարճլանք գավառ (հետագայում՝ Խաչենի իշխանություն), մինչև 2023 թ․՝ Արցախի Հանրապետություն, Ասկերանի շրջան, Դահրավ։

Ասկերանի շրջանի Դահրավ գյուղից 3,2 կմ հարավ-արևմուտք՝ անտառապատ լեռան գագաթին գտնվող Սուրբ Սառա նահատակի մատուռի հյուսիսարևմտյան կողմում տարածվում է միջնադարյան գերեզմանոցը։ Ժամանակի ընթացքում անտառը ամբողջովին կլանել է գերեզմանոցի տարածքը։ Այստեղ տապալված, տեղաշարժված և հողածածկ վիճակում պահպանվել են գեղաքանդակ խաչքարեր և սալատապաններ։ Կոթողների մեծ մասը հայտնաբերվել և ուսումնասիրվել են 2021 թվականին, սակայն աշխատանքները ցավոք մնացել են անավարտ։ Ըստ նախնական ուսումնասիրությունների՝ այստեղ արձանագրվել են շուրջ երկու տասնյակի հասնող անարձանագիր խաչքարեր և տապանաքարեր, որոնք թվագրվում են 10-13-րդ դարերով։

Դահրավի բնակչության համար Սառա նահատակը եղել է կարևոր ուխտավայր։ Գերեզմանոցի տապալված խաչքարերից մի քանիսը դահրավցիների կողմից վերստին կանգնեցվել են։

Խաչենի իշխանություն, Հայ Առաքելական Եկեղեցի, 11-13-րդ դարեր

2021 թվականին Արցախի Հանրապետության ԿԳՄՍ Պատմական միջավայրի պահպանության պետական ծառայություն ՊՈԱԿ-ի աշխատակիցների կողմից հուշարձանի տարածքում կատարվել են դաշտային ուսումնասիրություններ։