Խաչքարը կերտվել է 12-13-րդ դարերում, ավելի ուշ՝ Աղին նահատակ եկեղեցու վերանորոգման ժամանակ (17-18-րդ դդ․) ագուցվել է եկեղեցու հյուսիսային պատին։ Կարմիր գյուղը 2023 թվականի սեպտեմբերի 20-ին բռնազավթվել է Ադրբեջանի կողմից։ Հուշարձանի ներկայիս վիճակն անհայտ է։

Պատմական Մեծ Հայքի Արցախ աշխարհի Մուխանք գավառ (հետագայում՝ Վարանդա), մինչև 2023 թ․՝ Արցախի Հանրապետություն, Ասկերանի շրջան, Կարմիր գյուղ։

Խաչքարը հորիզոնական դիրքով ագուցված է Աղին նահատակ եկեղեցու հյուսիսային պատին։ Հորինվածքի կենտրոնում զույգ եռաբողբոջ վերջավորություններով ծաղկած հիմնախաչն է՝ երկու կողմից և վերևից ներփակված պարանահյուս զարդագոտի շրջանակով։ Վերջինիս վերին աջ և ձախ անկյուններից դեպի խաչի հորիզոնական թևերը կախված է խաղողի մեկական ողկույզ, իսկ ստորին հատվածում՝ կենտրոնից դեպի աջ և ձախ, բարձրանում են պարզ, վերևում դեպի ներս փաթաթվող զույգ արմավազարդերը։ Խաչաթևերին նշմարվում են փորագրված տառերի հետքեր։

Անչափ ուշագրավ է խաչից ցած՝ կենտրոնում տեղադրված տղամարդու, ամենայն հավանականությամբ, հանգուցյալի պատկերաքանդակը։ Վերջինս ձախ ձեռքով բռնած է հաստոցի վրա դրված ինչ-որ շրջանաձև իր (միգուցե տակառ կամ ակ), իսկ աջ ձեռքում հյուսնի ուրագ է, որով մշակում է այդ իրը։ Արհեստավորը՝ ենթադրաբար հյուսնը, պատկերված է բարձին նստած, երեք քառորդ դիրքով, գլուխը դիմահայաց¹։ 

Խաչքարն ի սկզբանե կանգնեցված է եղել պատվանդանին, որի համար նախատեսված ելուստը պահպանվել է։