Կառուցվել է 1950-ական թվականների վերջին։ Կանգուն է եղել մինչև 1991 թվականը։ Ավերվել է ադրբեջանական ոստիկանության զորքերի կողմից գյուղի բռնազավթման ժամանակ։ 2013 թվականին ամբողջությամբ վերականգնվել է։ 2020 թվականի սեպտեմբերից Քարագլուխը կրկին բռնազավթվեց Ադրբեջանի կողմից։ Հուշարձանի ճակատագիրը ներկայումս անհայտ է։

Պատմական Մեծ Հայքի Արցախ աշխարհի Սիսական ի Կոտակ գավառ (հետագայում՝ Դիզակի մելիքություն), մինչև 2020 թ․՝ Արցախի Հանրապետություն, Հադրութի շրջան, Քարագլուխ։

Հայրենական պատերազմում զոհվածների հուշարձանը կառուցվել է 1950-ական թվականների վերջին¹՝ քարագլխեցիների հանգանակությամբ։ 1991-1992 թվականներին ադրբեջանական ոստիկանության զորքերի (ՕՄՕՆ²) կողմից «Օղակ» գործողության ժամանակ գյուղը բռնազավթվել է և ենթարկվել համատարած ավերածությունների, ինչի արդյունքում հուշարձանը տապալվել է՝ հարավային և հյուսիսային կողմերին գամված մարմարե չորս ցուցատախտակներով հանդերձ, որոնց վրա եղել են զոհված հայրենակիցների անունները։ 2013 թվականին քարագլխեցի ռուսաստանաբնակ ճարտարապետ Մաքսիմ Աթայանցի նախաձեռնությամբ և ֆինանսական միջոցներով հուշարձանը վերականգնվել է իր նախնական տեսքով՝ բացառությամբ մարմարե փշրված սալերի։

Հուշարձանը ուղղանկյունաձև սլացիկ կառույց է, որը պսակվում է քիվերով կազմված երկթեք ծածկով։ Վերջինիս կազմած ճակտոնի կենտրոնական հատվածում քանդակված է դափնեպսակի մեջ առնված հնգաթև աստղը։ Նույն մասում՝ արևելյան ճակատի միջնահատվածում, փորագրված է՝ Հայրենիքի ազատության և անկախության համար զոհված քարագլխեցիների հիշատակին, 1941-1945։

Հուշարձանի ստորին հատվածում՝ կամարաձև վերնամասով խորշի մեջ, աղբյուրն է։ Կամարակապ խորշը երիզված է գլանաձև շրջանակով, որը վերնամասում գալար է կազմում՝ ընդգրկելով անմոռուկ ծաղկազարդը։