Գերեզմանոցը հիմնվել է առնվազն 12-13-րդ դարերում։ Պահպանված խաչքարերը և շիրմաքարերը փաստում են, որ այստեղ հուղարկավորություններ են կատարվել մինչև 20-րդ դարի սկիզբը։

2023 թվականի սեպտեմբերից Արցախը բռնազավթվել է Ադրբեջանի կողմից։ Հուշարձանի ներկայիս վիճակն անհայտ է։

Կարկաժան (Քրքջան, Հին Կրկժան)

Խաչքարեր, տապանաքարեր

Մեծ Հայք, Արցախ աշխարհ, Հարճլանք (հետագայում՝ Վարանդա) գավառ։ 19-20-րդ դարերում Ելիզավետպոլի նահանգի Շուշվա գավառի մաս է կազմել։ 1991-1992 թթ․ Կարկաժանն ազատագրվել է, որից հետո միավորվել է Ստեփանակերտ քաղաքին։

Ստեփանակերտ, Կարկաժան (Հին Կրկժան)

Գտնվում է Ստեփանակերտի Կարկաժան թաղամասի հարավարևմտյան կողմում։

Գտնվում է Ստեփանակերտի Կարկաժան թաղամասից 200 մ հարավ-արևմուտք՝ մեղմաթեք սարահարթի արևելյան եզրին։

Ստեփանակերտի Կարկաժան թաղամասի հարավարևմտյան եզրին՝ մեղմաթեք սարահարթի արևելյան ծայրամասում, տարածվում է Հին Կրկժան գյուղատեղիի գերեզմանոցը։ Այստեղ հստակ տարբերակվում են թաղումների երկու ժամանակագրական շերտեր, որոնցից առաջինը թվագրվում է 12-15-րդ դարերով, իսկ երկրորդը՝ 18-20-րդ դարերով։ Հին հատվածն առանձնանում է հարթ, անմշակ, անարձանագիր սալատապաններով և գեղաքանդակ խաչքարերով։ Նոր հատվածի շիրմաքարերը հիմնականում ուղղանկյունաձև են, սրբատաշ և ունեն զարդաքանդակային պարզ տարրեր։ Հատկանշական է նաև այս շիրմաքարերի վրա փորագրված արձանագրությունների առատությունը, ինչպես նաև բավարար պահպանվածությունը։ Գերեզմանոցի նոր հատվածում ակնհայտորեն նկատելի է տեղադրված գերեզմանաքարերի մեծ խտությունը, որը 18-20-րդ դարերում տարածքի ժողովրդագրական պատկերի փաստացի ցուցիչ է։ 12-15-րդ դարերով թվագրվող հատվածի արևելյան կողմում պահպանվել են նաև ուղղանկյունաձև շինության՝ հավանաբար մատուռի քարաշեն հիմնապատերի մնացորդներ։

12-20-րդ դարեր

Հուշարձանը բավարար ուսումնասիրված չէ։ Պատմական տեղեկություններ կամ վկայություններ հայտնի չեն։ 2012-2013 թթ․ Արցախի Հանրապետության կառավարությանն առընթեր զբոսաշրջության և պատմական միջավայրի պահպանության վարչության «Պատմական միջավայրի պահպանության պետական ծառայություն» ՊՈԱԿ-ի կողմից հուշարձանի տարածքում կատարվել են դաշտային ուսումնասիրություններ, կազմվել է հուշարձանի վկայագիր։

Կրկժանի հին գերեզմանոցը կարևոր պատմամշակութային վկայություն է, որը ներկայացնում է Ստեփանակերտի տարածքում բազմադարյա հայկական ներկայության և ինքնությունը պահպանած բնակավայրերի, ինչպես նաև բնակիչների փաստացի պատմությունը։ Գերեզմանոցի տարածքը ձևավորվել է առնվազն միջնադարում։ Պահպանված գերեզմանակոթողների տարբեր ձևերը և տիպերը, ոճական առանձնահատկությունները և հարուստ արձանագրությունները վկայում են Կրկժանի հին գերեզմանոցի շարունակական օգտագործման մասին մինչև նոր ժամանակներ։