Նորակերտ խաչքարը կանգնեցվել է ի հիշատակ 1990-1994 թթ․ Քարագլխի բարձունքի պաշտպանության համար զոհված խնձրիստանցիների և դարձել ուխտատեղի մարտական ընկերների ու համագյուղացիների համար։

2022 թվականի մարտի 24-ից տարածքը բռնազավթված է Ադրբեջանի կողմից։ Հուշարձանի ներկայիս վիճակն անհայտ է։

Մեծ Հայք, Արցախ աշխարհ, Հարճլանք գավառ (հետագայում՝ Խաչենի իշխանություն), մինչև 2020 թ․՝ Արցախի Հանրապետություն, Ասկերանի շրջան, Խրամորթ գյուղ, Քարագլուխ գյուղատեղի։

Խաչքարը գտնվում է Քարագլուխ գյուղատեղիի Խաչին խութ գերեզմանոցի հյուսիսային կողմում։ Տեղադրված է կաղնու ծառի տակ՝ 13-րդ դարի խաչքարի հարևանությամբ։ Կոթողը կանգնեցված է ոչ մեծ, ցածր պատվանդանի վրա և սահմանազատված է երկաթե չորս ձողերով ամրացված շղթաներով։ Խաչքարի գլխավոր՝ արևմտահայաց ճակատին կլոր, վարդյակաձև խաչարմատից սկիզբ առնող մեծադիր խաչն է, որի ուղղահայաց թևի ստորին հատվածից դեպի աջ և ձախ են տարածվում ավանդական արմավաճյուղերը։ Խաչաթևերի միացման կենտրոնում՝ կարծես շողարձակող նախշազարդի մեջ, փոքր գծախաչ է ուրվագծվում։ Խաչաթևերն իրենց հերթին հարդարված են հյուսկեն նախշերով։ Հորինվածքը ներփակված է վերևում խաչաթևերն ուրվագծող փորածո խաչախորանի մեջ, որից ցած փորագրված է ինըտողանի արձանագրությունը․ «1990-1994 | ՔԱՐԱԳԼԽԻ | ԲԱՐՁՈՒՆՔՆԵՐՈՒՄ | ՀԱՎԵՐԺԱՑԱԾ | ԽՆՁՐԻՍՏԱՆՑԻ| ԼԵՌՆԱՅԻՆ| ՏՂԱՆԵՐԻ | ՊԱՅԾԱՌ | ՀԻՇԱՏԱԿԻՆ»։

Կոթողի վերնամասը քանդակված է որպես ջարդված, ոչ ամբողջական խաչքար՝ խորհրդանշելով խնձրիստանցի հերոսների անավարտ կյանքը։

Կարևոր նշանակություն ունի Քարագլխի պաշտպանության համար զոհված խնձրիստանցի ազատամարտիկների հարազատների, մարտական ընկերների և համագյուղացիների համար՝ ծառայելով որպես ուխտատեղի և հիշատակի վայր։